¹ L’autoritad chantunala cumpetenta expulsescha persunas estras, sche:

a.

ellas laschan passar il termin ch’è vegnì fixà per lur partenza da la Svizra;

b.

lur spedida u lur expulsiun po vegnir exequida immediatamain;

c.¹⁶⁴

ellas sa chattan en arrest tenor ils artitgels 76 e 77 ed igl è avant maun ina decisiun d’expulsiun u da spedida cun vigur legala u ina decisiun d’expulsiun cun vigur legala tenor l’artitgel 66a u 66a^bis CP¹⁶⁵ u tenor l’artitgel 49a u 49a^bis LPM¹⁶⁶.

² Sche persunas estras han la pussaivladad da bandunar la Svizra legalmain en plirs stadis, las po l’autoritad cumpetenta expulsar en il pajais da lur tscherna.

³ L’autoritad cumpetenta po suspender l’expulsiun per in tschert temp, sche circumstanzas spezialas sco problems da la sanadad da la persuna pertutgada u la mancanza da meds da transport pretendan quai. L’autoritad cumpetenta conferma a la persuna pertutgada en scrit la suspensiun da l’expulsiun.¹⁶⁷

⁴ Avant ch’expulsar persunas estras minorennas betg accumpagnadas verifitgescha l’autoritad cumpetenta che quellas vegnian surdadas en il pajais da return ad in commember da la famiglia, ad in avugà ubain ad ina instituziun da recepziun che garantescha la protecziun da l’uffant.¹⁶⁸